gusto mo bang sumama saken?

kasabay ng hindi ko maipaliwanag na kaligayahan, dinama ko ang haplos ng malamig na hangin sa mukha ko, hinayaang ilipad ang ilang buhok na tumakas sa pagkakapusod…daig pang tigang na lupa ang katawan ko, kaluluwa na inulanan ng sariwang hangin na nilalanghap ko ng mga pagkakataong iyon… uhaw na uhaw…
pinaglalaruan ng mga daliri at palad ko ang mga damo sa paligid ng aking kinauupuan… tinanggal ang maliliit at makakating amor-sekong kumapit sa tagiliran… napangiti sa alaalang munti naming laruan iyon, isang waring sandata ng ninja…muling pinagmasdan ang lawa na natatanaw sa di kalayuan…ang kalmadong tubig nito ay wari bang sumasagisag sa kapayapaang nararamdaman ng puso ko…binusog ang mga mata sa malawak na bughaw na kalawakan at ng mapagkumbabang kapatagan…
kinuha ang bitbit na kandila at posporo… umusal ng dasal ng pasasalamat bago tuluyang taimtim na pumikit, hudyat na sa muling pagmulat ng aking mga mata…

…wala na ako sa tuktok ng bundok na iyon,
ngunit sa ibabaw ng aking kama…

image:ninenok kay tropang remo:P

Note: pag-uwi ko ng Batangas, sana magkaroon ako ng pagkakataon na makaakyat ulet ng bundok Maculot…sinong gustong sumama?